本文重點
秋風起，又嚟到大閘蟹橫行各大食肆嘅時候，賣大閘蟹超過半個世紀嘅華記永昌號，尋日孖埋德國孖人牌，喺鑽石山荷里活廣場聯手搞咗個「蟹Tea茶聚」，華記永昌號第二代傳人朱家昌仲教路點樣揀靚蟹，佢嘅三大法則真係令人得益非淺㗎。
朱老闆話，依家屬於季初，重約四両半至五両半嘅蟹最靚，下禮拜日（十號）踏入季中，靚蟹就要揀五両半至六両。揀蟹時要眼、手、鼻並用，先用眼睇吓紋理係咪清楚、幼細，然後用手彈吓隻蟹嘅眼或者扯吓蟹腳，睇吓佢係咪好生猛咁反抗，最後用鼻聞吓，如果味道清香代表佢出身於靚湖水，實係身嬌肉貴㗎啦！
怕寒唔好食蟹心
華記永昌號嘅上海點心師傅昌哥尋日都親自出場示範點樣炮製大閘蟹，佢話食蟹時佐以花雕酒係至正嘅享受，怕寒就千祈咪食蟹心啊！