波斯地氈以傳統手織工藝譽滿全球，家居擺一張零舍醒神。有「鯊魚女」之稱嘅保良局總理陳細潔（Abby）位於半山梅道嘅二千八百呎大宅就有唔少藏品，波斯地氈更由門口玄關鋪至大廳，滿室都係瑰麗色彩。
Abby第一張波斯地氈係幾年前購自香港一個地氈拍賣會，從此不能自拔，即使去澳洲旅行都趁機尋寶，果然畀佢「獵」得一張價值十七萬港元嘅巨型地氈，佢好興奮咁運返香港，鋪喺客廳正中央任欣賞。依家Abby手上已經有八張波斯地氈，最珍貴嗰張，係一幅有百年歷史嘅古董地氈，佢回憶話，當日佢同另一名南亞裔商人同時睇中，雙方拉鋸七、八小時，最後佢施軟功游說對方，終以超低價八萬港元成交。
到底波斯地氈有乜魔力呢？Abby話，鍾意佢顏色瑰麗，造工精巧，放一張喺屋企，滿室充滿色彩。每年佢會聘專人嚟屋企大清洗地氈，家中有大型派對，亦會吩咐傭人將地氈捲起，免得客人唔小心倒瀉紅酒、橙汁，以免肉赤。