揠苗助長踢人入木人巷

年前先以新鮮面孔當選理事長嘅吳秋北係工聯會力捧對象，今次火速成為勞顧會提名委員，更顯示佢篤定走工聯會領導層進身立法會之路，即係先做工聯會要職，然後喺勞顧會吸收經驗，之後代表工聯會入議會。現任會長鄭耀棠當年進身立法會時咁樣行過，之後又有前任理事長、現任工聯會立法會議員黃國健等。

佢哋呢條參政之路同少林寺嘅木人巷有異曲同工之妙，事關工聯會議員最大嘅政綱就係勞工事務，喺勞顧會浸過，可以培養佢哋對勞工政策嘅認識以及同勞資高層協商嘅經驗。只係吳秋北今次做勞顧會，據講有啲揠苗助長嘅味道，因為原本代表工聯會嘅勞顧會成員唔願進身立法會，逼住佢要早啲頂上。

梁美芬靠諮詢服務拉客

另一方面，喺九龍西出選嘅專業會議梁美芬尋日都展開攻勢。據講，二○一二年嘅選舉佢幾乎肯定唔會再獲工聯會「過票」支持，所以佢要靠自己，尋日宣布旗下嘅西九新動力邀得十二名工程師同規劃師加盟，專為九龍西居民提供免費專業諮詢服務，拉攏民心。

梁美芬平日同專業會議嘅何鍾泰關係唔見特別緊密，估唔到佢同工聯會「分手」，第一個出嚟撐佢嘅竟然係何鍾泰。何旗下嘅工程界促進會尋日同西九新動力舉行聯合記者會，何鍾泰仲話，正籌備成立智庫，日後可以支持西九新動力嘅政策研究咁話。