剛於本月初在新加坡勇奪世界健體小姐冠軍、世界健美小姐亞軍、亞洲健體小姐冠軍及亞洲健美小姐亞軍的鄭麗莎（Lisa），身高一米七三，只有二十四歲。

Lisa曾習泰拳和跆拳道，身手了得。

放大圖片

她十二歲玩攀石，十六歲在亞洲青少年攀登錦標賽奪得首面金牌後，○四年開始年年排名全港第一。最巴閉是○六年運動攀登世界盃速度賽摘金，成為世界冠軍。近年她以玩票形式參加長洲搶包山，贏得「蜘蛛女」稱號。

「健體原來可咁靚」

稱霸攀石界後，○五年Lisa再找到另一人生目標。當時在IVE讀書的她，受老師鼓勵，參加健體小姐比賽，從此着迷：「老師睇中我玩開攀石，身體線條好。比賽喺新加坡舉行，攞冠軍嘅日本參賽者，無論身形、化妝、儀態都好有女人味，我冇諗過玩健體原來可以咁靚！」

她不斷摸索鑽研，翌年參加全港健美錦標賽，即奪健體小姐冠軍，至今已成五連冠，今年更兼奪華南賽冠軍，成績無人能及。為了備戰今次新加坡的世界及亞洲賽，她不惜自費學化妝、泰拳、跆拳道和肚皮舞等，更跑到廣州學儀態和體操。「刻苦、自律係運動員基本條件，我一星期操足七日，連最鍾意食嘅飯都要戒。」她笑說。

「我好鍾意楊紫瓊」

完成比賽後，Lisa將有另一創舉—「打」入荷里活。她雀躍道：「傾緊一部荷里活電影，都七七八八，明年亦可能拍一套內地嘅詠春電視劇！」拍戲一直是Lisa夢想，過去也有電影公司接觸她，但她認為運動員生涯仍有可為，又不喜歡困身的工作形式，故一直未有動心。

今次打動Lisa的正是度身訂造的劇本，讓她大展身手：「我唔想做行行企企嘅花樽，希望搵我拍戲嘅人，係真正欣賞我個人。我好鍾意楊紫瓊、Maggie Q，覺得佢哋打得好有型，楊紫瓊之後香港都冇乜打女，拍動作片我有優勢，有信心展示實力！」

鄭麗莎 Lisa 小檔案

年　　　齡： 24歲

學　　　歷： 菲律賓比立勤國立大學運動及康樂管理學士

香港專業教育學院運動管理及訓練學高級文憑

現　　　職： 運動員、城大毅進計劃客席講師、健身教練、模特兒

近年威水史

2010 世界及亞洲健體小姐冠軍

中國國際健美健身錦標賽（江蘇連運港）女子健身小姐冠軍、女子健體小姐冠軍、全場健身小姐最佳形象獎、華南女子健體小姐冠軍

2006-10 全港健美錦標賽健體小姐冠軍

2004-10 香港女子速度攀登排名第一

2007 國際運動攀登總會女子速度攀登世界排名十四

2006 運動攀登世界盃速度賽女子組冠軍