添主題色彩無關痛癢

政府新聞處嘅效率一向為人詬病，早前班副局政助難得組團訪滬，就係因為新聞處遲出相同遲發稿，令新聞變晒明日黃花冇人報。做嘢慢不特止，新聞處近年仲出盡陰招，將所有具爭議性嘅政策谷晒喺同一日公布，藉此分散大眾嘅注意力，令傳媒疲於奔命。

尋日上「改革」後嘅新聞網睇吓，發現新聞處只係為網頁設計咗六個系列嘅主題色彩，兼且將個版面改得更個人化，就話希望咁樣可以吸引多啲年輕一代上去睇。其實市民最想見到新聞處大刀闊斧提高政府透明度，唔好將啲資料收收埋埋，剝削市民知情權。新聞處呢啲無關痛癢兼過時嘅改革，只不過係換湯不換藥！