點小心法？李業廣話就算佢有秘書專責幫佢處理申報嘅文件，佢每次都會金睛火眼望一次，實行做最後把關，確保報齊所有利益至簽名。唔通李業廣暗批發叔冇睇齊資料就亂簽名？李業廣冇表態，但就話佢自己嘅申報好易處理，因為最近已經唔係好積極投資，所以申報都冇乜改動喎！

撐藝術節全家訂飛

唔投資，咪做推銷囉！身為香港藝術節協會有限公司主席嘅李業廣就力銷藝術節，仲身體力行支持添！藝術節今日起接受優先訂飛，佢自爆同屋企人一齊訂咗好多個節目嘅飛，足足寫滿三張訂飛表格。

唔講唔知，李業廣一家對藝術嘅偏好都唔同，佢鍾意睇歌劇同芭蕾舞，太太就偏愛話劇同粵劇，而囝囝鍾意聽流行音樂，所以凡係Rock同Jazz嘅表演項目都冇錯過，結咗婚又有小朋友嘅囡囡就要買合家歡劇目。嘩，就咁數都成十項，唔怪得李業廣搞訂飛搞到頭痛啦。