東華三院致力協助殘疾人士融入社區，尋日喺堅尼地城域多利道一號開設「iBakery愛烘焙麵包工房」，東華主席梁定宇、前主席李三元同多位總理齊到賀，品嘗吓熱辣辣嘅麵包。
賭王何鴻燊女兒何超蕸都係東華總理，見店內有新鮮出爐曲奇，顯得好雀躍，仲大爆賭王勁鍾意食甜品，而爸爸同佢一樣，視芝士餅為頂級「飛佛」。唔知超蕸會唔會打包兩件餅返屋企氹爸爸開心呢？
梁主席都打雀咁眼望住啲朱古力曲奇，原來佢係朱古力迷，屋企更有一個朱古力團隊，事關太太同五歲囝囝都係無朱古力不歡，但平時食麵包，梁主席就揀麥包，貪佢健康啲。
有份嚟主禮嘅勞工及福利局局長張建宗都話自己係曲奇迷，咁鍾意乜嘢口味呢？佢就好貪心咁話：「乜味都鍾意！」