富貴黨「哪吒」方國珊係西貢區委任區議員，一早諗住喺堆填區附近嘅住宅區選區議員。政府睇準呢一點，聽講環境局先後聯絡咗唔同黨派嘅議員，話佢哋如果聯手要求廢法，等同變相支持哪吒，明顯係施離間計，想瓦解團結力量。

政府嘅第二招毒招，就係環境局早前主動約見一批垃圾車職業司機，同佢哋講若果立法會否決擴建將軍澳堆填區，佢哋嘅生計必受到影響，嚇到班司機鼻哥窿都冇肉，認為「兩個大人打交，唔好搵着啲小朋友嚟搞」。司機無辜做咗夾心人，於是搵佢哋嘅立法會功能界別代表、富貴黨主席Miriam劉健儀吐苦水，有司機仲遷怒哪吒，話諗過去包圍哪吒添！

點知副局長潘潔前日同議員講，如果將軍澳堆填區滿咗，就要將垃圾運去屯門或其他更偏遠嘅地方，屆時垃圾車喺路上行走嘅次數將會更頻繁。喺咁嘅情況下，司機嘅生意就算唔會多咗，都一定唔會少，點會好似政府同佢哋講咁會影響生計呢？潘潔自己踢爆謊言，即係政府擺明係靠嚇啦！政府真係無所不用其極。