06/10/2010

播放本新聞相關短片

政情:落區會銷申亞 許曉輝捱炳

政府公布預計動用逾四百億元申辦亞運會嘅諮詢文件後,立法會各黨派初步嘅反應已經唔好,質疑政府搞「大白象」工程,跟住政府即刻落區打民意牌,首個推銷對象係荃灣區議會,仲得到大多數區議員支持,而坐喺會議室嘅推銷員、民政事務局副局長許曉暉算係嘗到甜頭,笑到見牙唔見眼。之不過,喺建仔轉軚反對申亞之後,形勢逆轉,許曉暉尋日連去兩個區議會,席間都畀班區議員炳鑊甘。

擔心變另一個新德里

許曉暉晨咁早就山長水遠出席屯門區議會地區設施管理委員會會議,咪以為誠意搭夠就有同情分,建仔嘅區議員陳雲生話,席間只有一、兩個委任區議員表態支持申亞,但各黨派嘅民選區議員一面倒唔支持,指香港根本冇能力、冇條件搞亞運會,擔心變成另一個新德里,搞英聯邦運動會搞到一鑊泡;仲有就係依家香港咁多窮人,政府應該用多啲資源嚟扶貧先至啱。

鬧鬧吓,有區議員仲翻政府舊帳,鬧政府早前搞東亞運動會時承諾喺屯門興建射擊場,最後爛尾不特止,到依家都未搞得掂。另有區議員仲兜口兜面咁鬧許曉暉,話政府若果數夠票,副局長又點會落嚟區議會諮詢吖,依家根本就係有事鍾無艷、無事夏迎春。

反對倉卒諮詢就拍板

上晝捱轟後,下晝都唔好過。許曉暉落到黃大仙區議會相關會議,大多數區議員都只係原則性支持申亞,但唔贊成政府倉卒諮詢就拍板申辦。區議員林文輝喺會後話,好多區議員都話市民根本唔知道申亞嘅詳情,作為民意代表又點可以夾硬代佢哋支持呢項計劃呢?就算政府延長諮詢期都係冇用。跟住佢仲窒許曉暉,話若果政府喺其他民生政策諮詢都好似申亞咁積極,相信呢啲政策會得到市民支持,唔會搞到民怨沸騰。

老實講,許曉暉應該早就預料落區議會諮詢會有咁嘅結果,尤其呢班區議員唔學似嗰啲維園阿哥,畀佢使柔招,花百幾蚊請飲嘢就冧晒,依家講緊嘅係逾四百億元呀,睇到呢兩個區議會嘅反應,睇怕佢稍後再去其他嗰十五個區議會都會係同一下場—就係捱轟囉!