樓價狂飆，社會各界都抱怨上唔到樓，要求政府復建居屋嘅遊行示威更係年中無休，預計房屋政策點都會係今年施政報告嘅重點。點知翻查議員提出議案嘅名單，白鴿黨李永達、富貴黨主席劉健儀同專業會議梁美芬等打算提出嘅議案，竟然一窩蜂同房屋政策有關，似乎唔多信政府可以喺施政報告度解決到呢個難題，未復會就先剃政府眼眉。邊位議員可成功提出議案？就要等遲啲抽籤定奪嘞。

不過，街工梁耀忠就成為今年首個「幸運兒」，可以喺施政報告之後嘅首次立法會會議上討論佢年年必提嘅殘疾人士交通需要議案；早前因為跟八達通事件而上位嘅工聯會王國興，亦成功「中獎」，可以喺復會後即刻跟進佢最關注嘅個人私隱保障議題。