對數字有天賦強勁記憶力嘅金勞詹，一向偏好有數得計嘅百家樂，賭城傳嚟嘅消息話，金勞詹贏得驚險，大賽分初賽、複賽、準決賽同決賽，佢係賭城貴賓，由複賽落場，準決賽突圍，一直手風唔錯，直到決賽尾段，佢手上嘅籌碼一直排第三位，為七十二萬美金，較排第一、二位嘅對手分別少兩萬同四萬美金，一路咬得好緊，戰情緊湊。到最後一鋪，兩位對手買莊，金勞詹買閒，即自己操牌，由自己決定命運。派出嘅第一隻牌，佢攞五點，莊家六點，以百家樂貼近九點為最大嘅原則，佢第二隻只有攞二、三、四點先至贏，一點打和，其他求其九隻跌落佢度都會輸，即係論或然率，佢輸咗七成半，但佢最後攞到隻「二仔」，反敗為勝，勇奪冠軍，成為第一個喺拉斯維加斯百家樂正規賽事中打入三甲嘅香港人。

我哋打電話畀仍身在賭城嘅金勞詹，佢話唔想鼓吹賭博，指賭枱上離唔開運氣，做人都係腳踏實地好；如果一定要賭，亦請唔好影響工作同家庭咁話。