驚漏申報貴重禮物

棠哥尋日公布工聯會一年一度嘅深港金融業高爾夫球邀請賽具體安排，會後大家問佢點防止大頭蝦漏報失誤，佢話自己名下物業少，一粒鐘時間寫完份行會申報表，不過，曾有一名已卸任嘅「商人局長」同佢呻過，話名下物業同公司太多，每次要搞足一個禮拜至列齊張清單，仲辛苦過搞自己盤生意，所以佢好諒解發叔喎！

雖然棠哥身外物唔多，但對申報仍小心翼翼，好似今年初佢出席活動後收到一份金燦燦嘅紀念品，心情唔係興奮，而係心驚，驚價值可能超過行會申報冊上列明凡超過二千元就要申報嘅規定，於是返到屋企都打番電話畀主辦單位，問清楚係鍍金定真金，搞清楚價值唔過二千蚊先至安心收。

其實，棠哥使乜咁轉接打去問主辦單位吖，倒不如用番原始啲嘅方法，咬吓件禮物，咬得入咪係金囉，到時有理冇理申報咗先算。