本文重點
菱電發展主席Herman胡曉明公職一籮籮，早前見佢略帶倦容咁出席城大頒發榮譽院士典禮，佢直言城大有活動，佢無論幾忙都要鼎力支持。好彩當日佢着咗套Brooks Brothers淺色西裝，又配搭咗條圖案精緻、色調柔和嘅灰白色Dunhill高爾夫球人仔靚呔，即時掃走幾分倦容。
鍾意Dunhill呔多花款
Herman係加州大學舊生，對於來自美國嘅Brooks Brothers喜愛有加，佢話喜歡呢個牌子嘅衫夠啱身。至於條Dunhill領呔係英國老牌子，佢哋每季都會推出唔同圖案襯晒品牌形象，Herman嗰條就鋪滿晒揮緊桿嘅人仔，但佢笑言依家已經好少打高球喇！
佢坦言好鍾意城大，本港商界亦都最鍾意聘用城大學生，因為佢哋多數係屋企嘅第一代大學生，即係嚟自社會基層，待人處事較實在。佢唔係賣花讚花香㗎，事關佢身兼另外兩間本地大學嘅校董會或顧問委員，但城大依然係佢心目中嘅No.1。