本文重點
好多議員趁住立法會抖暑出外旅遊充電，而工聯會立法會議員KK黃國健都唔例外，佢同太太、囝囝就喺上月釣魚島事件未升溫前去咗北海道度假。KK話當地雖然風景優美，而且有美饌佳餚，但天氣唔係想像中咁清涼，所以有啲失望。佢話北海道今年日間竟然去到三十一度，連導遊都話天氣反常，東京就更加去到三十七度添！
嗜美食大破慳囊
雖然天氣一般，但當地食物真係值得一讚。KK話北海道最出名就係海鮮同和牛，雖然呢兩樣嘢都價值不菲，但一場去到都不惜大破慳囊。以和牛為例，一盒八安士就要成千蚊港紙，好在食少少就已經覺得膩，所以唔會多食。海鮮方面，KK一家今次試咗新鮮雪場蟹，呢種蟹鮮味無比，但價錢同樣唔平，一隻一點三公斤嘅就要成千蚊港紙。
KK去北海道都有浸溫泉，至於出名嘅花海就因為時間唔啱所以欣賞唔到。佢話若有機會再去嘅話一定要趁冬天去，因為希望欣賞當地名聞遐邇嘅雪景喎。