邱騰華有鋪縮沙癮

不過，說時遲那時快，邱局長唔知係咪同副手八字唔夾，副局長潘潔尋日喺立法會一個委員會上，以無限惋惜嘅語氣，話拎五公頃地出嚟，好似割咗佢塊肉咁，變相同環境局局長打對台，唔知情仲以為係環保團體代表講嘢添！呢對上司下屬簡直係互打嘴巴。

潘潔同邱局長口徑不一其實唔係新事，大家猶記得今年年初，潘潔喺立法會環境事務委員會上話打算以加牌費去淘汰柴油商業車，引起外界嘩然。邱局長喺短短三粒鐘之內，就喺立法會大會上完全推翻潘潔嘅講法，足以印證呢對正副局長係零溝通。

溝通出現問題，到底責任誰屬呢？邱局長嘅嫌疑就最大，皆因前車可鑑。早前備受爭議嘅停車熄匙條例草案推出時，大家就好易睇到，邱局長其實有鋪縮沙癮，凡係要面對群眾嘅場面都會缺席。除咗鍾意用「吹風會」公布政策，「城市論壇」第一次辯論停車熄匙時，邱局長仲推咗下屬環保署副署長陳嘉信出去受靶，連之後嘅電台節目都係由陳嘉信頂上，唔講仲以為環境局局長換咗人做！

潘潔焗住開會解畫

睇番今次喺推動附屬法令上，邱局長又做咗啲咩呢？最深入民心就係前日親身落區做騷，帶住記者喺將軍澳行足三粒鐘，之後佢仲親筆寫咗信畀審議附屬法例嘅小組委員會主席，希望委員會支持法令。

睇呢啲細節，大家都以為邱局長好上心啦，但實情係，小組委員會開咗五次會，邱局長一次都冇上過去解釋政策，就連潘潔都係尋日見事態嚴峻，唔解畫唔得掂，先至開咗一次會咁大把。

環境局呢對「活寶貝」嘅行動力咁弱，再加埋兩人成日講嘢唔對嘴，難怪次次咁多環保政策爛尾啦！