德媽：因為辦亞運要四百幾億，呢筆錢可以用嚟幫窮人，可以用嚟搞經濟，等爸爸媽媽搵多啲，爺爺嫲嫲生活好啲，點都好過搞亞運一次過使晒佢咯。

德成仔：之不過叔叔話，可以一路使錢搞亞運，一路使錢幫窮人o架喎。

德媽：阿仔，你記唔記得，上次你要買對靚波鞋去球場威，最後點樣爭取到o架？

德成仔：因為我日日準時返學，交足功課，無犯校規，期終考試科科合格，所以媽咪買畀我。

德媽：依家叔叔要威，要攞四百幾億搞亞運，但係好多窮人要求改善生活，好多老人家等緊政府安老院，好多司機要求政府買番海底隧道，好多運動員希望政府提高資助，等佢哋可以專心練習，仲有呀，大家都要求政府改善貧富懸殊，提升老人福利。咁多嘢，叔叔一樣都未做到，咁你話市民應唔應該畀佢攞錢去威呀？係咪應該學你咁，交足功課先再講呢？

德成仔：咁，叔叔咪好失望咯。

德媽：咁又未必，因為叔叔講，搞亞運係為咗令香港人更團結吖嘛。你睇吓，依家全香港市民已經團結一致反對政府申辦亞運，叔叔幾成功！

德成仔：叔叔好叻啊！

德媽：係啊。

德成仔：既然未搞亞運就已經達到目的，咁就真係唔使搞啦！

德媽：啱啦，乖仔！