創於一九二○年的百成堂已有九十年歷史，三十五歲的李俊文（Thomson）是董事總經理，也是百成堂第三代傳人。他是長子，中四便到澳洲讀書，九七年大學畢業返港，曾在多家跨國企業工作，○二年接掌家族生意。
「最初真係冇諗過入行，但始終係屋企一分子，應該有承擔。」「番書仔」首要任務是為老牌注入生氣：「○二年只有兩間店，主要做中藥批發，店員年紀較大，客人入到嚟要乜就畀乜，服務好單向。」
加強零售 口碑最緊要
他銳意革新，首先是加強零售業務，推出多款保健產品，如招牌冰糖燕窩、野生冬蟲夏草丸、鹿茸丸等：「呢行誠信好重要，我哋所有藥材都經過多重驗證，喺香港自設廠房生產，保證正貨。」他認為口碑就是最好的宣傳：「好多客人，幾代都幫襯我哋！」店面除了光鮮整潔外，他亦加入自己意見：「櫃面設計成弧形，令人有和諧感覺，選址亦揀人流多嘅大型商場。」
服務是最重要一環：「客人嘅健康會隨年紀變化，不同階段要配合不同補品，店員會主動了解客人進補習慣，話畀客人知，佢哋適合食啲乜。」他推出貴賓會員制，提供貼心的個人服務：「有啲藥材要加工處理先可以服用，例如要製成藥粉咁，我哋都會幫客人做埋。」
集思廣益 推出新貨品
集思廣益是進步的不二法門，除了做問卷調查收集意見外，更會定期舉行分享會，有兩成貨品便是收集顧客意見後推出。Thomson坦誠說：「聽員工意見好重要，我做生意都唔係乜都識，但只要有心、肯學就得，我要求員工亦係咁樣。」
Thomson讀工商管理出身，書本上的理論，是叫人在最短時間內賺最多的錢，但他拒絕「賺到盡」，反而幫到客人健康，才是他做生意的宗旨：「做生意要從心出發，務實去做，唔應該只着眼一時利益。幫到客人健康，我就最開心！」分店增至七間，業績穩步上揚，證明他走對了路。
李俊文 Thomson
小檔案 Profile
年齡：35歲
學歷：澳洲墨爾本大學工商管理學士
現職：百成堂集團董事總經理
婚姻狀況：已婚，女兒兩歲，兒子今年出世
興趣：攝影、設計