社民連嘅立法會議員黃毓民太太江金滿嘅座駕，尋日下晝三點幾喺火炭桂地新村公共停車場懷疑遭破壞，車頭擋風玻璃被人用錘仔扑到碎裂。黃毓民回應本報查詢時證實事件，稱已報警處理，相信事件同佢個人嘅政治活動無關。
黃毓民話，佢哋全家搬入桂地新村約八、九個月，架車係太太平時返麵店時用嚟代步嘅。尋日太太早咗返屋企，平時泊開嘅地方冇位，於是轉泊尋日出事嘅車位，今次係太太第二次泊喺出事車位度。佢懷疑因為泊咗人哋嗰車位出事，由於架車一向唔係佢用，所以相信事件同佢嘅政治活動無關。
佢又話事發之後太太都有啲驚，擔心自己嘅安全。至於被破壞嘅私家車已送去修理，佢哋亦都報咗警，同時向桂地新村村長投訴。