早就講過泛民主派嘅立法會議員表面團結，實質內部四分五裂，淨係睇下政改方案一役就好清楚喇，尋日又爆多單陳年舊仇出嚟添！就係街工嘅梁耀忠同社民連嘅「大舊」陳偉業，喺十九年前嘅全港首次立法會地區直選結怨，至今就算碰面都唔打招呼。呢個埋藏咗近廿年嘅秘密，隨着阿忠嘅新書《我固執而持久地過這種生活》而曝光。
阿忠早前花咗兩年時間寫書，講述佢由中學畢業、英國留學、踏上社運之路以至再成為立法會議員嘅人生點滴。書中最勁爆嘅秘辛，莫過於佢同大舊嘅一段恩怨。
事件發生於一九九一年，當時民主派喺葵青區好有勢力，依家係白鴿黨嘅高達「李永達」、大舊同阿忠都有意循新界南選區參選，當年行雙議席雙票制，三人協商一人自願退出。後來喺新界南民主派區議員聯席會議上投票，高達同資歷淺嘅阿忠勝出，大舊極度憤怒，拍枱離場。
誰料到咗報名一刻，高達公開表態拍大舊參選，阿忠惟有自己報名參選。書中形容，開票時兩人鬥得難分難解，大舊最終以約四千票之差險勝。自此一役，兩人就形同陌路嘞！