臨時最低工資委員會十三名委員，包括主席鄭若驊、三名官方同九名非官方委員，上月初終於就首個法定最低工資水平達成共識，訂喺時薪二十八蚊。曲終人未散，因為臨時委員會要過渡到最低工資委員會，據聞原班人馬唔會全部過檔。例如勞聯李啟明公職太多太忙唔想過渡到委員會，工聯會鄺志堅又因即將離開工聯會搵真銀，所以兩個空缺都要搵人。
老實講，最低工資水平嘅談判過程爭拗不斷，多次差啲反枱。據聞，喺談判可能拉倒嘅關鍵時刻，做過香港國際仲裁中心主席、擅長仲裁同調解紛爭嘅鄭若驊，就建議臨資會暫停開會一個月，等委員冷靜下再傾。復會後，資方委員陳裕光同麥瑞瓊繼續企硬，鄭若驊就再次出招，默許其餘七名非官方委員喺二十八至三十蚊範圍內繼續商討，變相將兩人孤立。點知突然有報章引述消息，話臨資會已初步同意將工資水平訂喺二十九蚊，令會內嘅資方委員非常不滿，質疑勞方委員亂向傳媒放風施壓。
直至八月談判死線臨近，陳裕光立場開始軟化，同意二十八蚊亦勉強可以接受，但麥瑞瓊依然企得好硬。不過鄭若驊再次發揮軟功，游說大家以和為貴繼續慢慢傾，最終搞掂埋麥瑞瓊同意二十八蚊。