富士攝影器材有限公司主席孫大倫早前獲城大頒發榮譽院士，嚟撐場嘅太太Betty鄧秀英同新抱Jacqueline鍾婉琪不約而同都挽住個Hermes靚袋。
Betty對Hermes好深情，用咗二十幾年都不離不棄。佢話以前冇咁多名人高調幫襯，佢就已經愛上Hermes，以前用嘅係三十五吋，依家鍾意用三十吋，貪佢夠實用、唔易爛又可以保值，最啱上班族女士用。二十幾年前佢曾經用兩、三萬蚊買咗個Hermes袋，用咗好耐都唔壞，後來轉售出去仲賺咗添！依家啲袋愈賣愈貴，佢笑言畀城中名媛追到貴晒。
佢又踢爆大仔道弘向新抱Jacqueline求婚嘅秘辛，話囝囝見媽咪係Hermes擁躉，唔經唔覺都認同呢個牌子，所以佢求婚嘅秘密武器就係Hermes手袋，上面仲吊住隻鑽石戒指，佢諗起囝囝咁有心思，都覺得好浪漫喎。