白鴿黨立法會議員張文光屋企大裝修，暑假旅行押後至上月中先成行，兩公婆去意大利觀光十日，然後去埋英國過睇波癮。張文係曼聯迷，去英國睇波唔係新鮮事，嗰場仲係保頓對曼聯嘅賽事添，梗係要捧場喇！之不過，深入死忠「粉絲」虎穴就係佢人生第一次，虎穴即係死忠「粉絲」專區嘅龍門第四排。
佢坐嘅嗰邊位，上半場近曼聯龍門，睇住「紅魔鬼」先輸一球再扳平，到下半場換邊，「紅魔鬼」又失波，正當大家肉緊到咬牙切齒之際，奧雲一個頭槌追和，張文形容奧雲仔好似就喺佢面前將個波頂入龍門，令佢High爆！再加埋身邊球迷全場又叫又跳，曼聯戰歌此起彼落，氣氛熱熾高漲，佢心諗真係從未如此High過。
雖然旅程咁開心，但一樣發噩夢，喺假期結束返港前一晚，佢夢見煲呔曾喺施政報告宣布向全港市民徵收太陽稅，佢激到拍枱大鬧，但鬧鬧吓，夢裏嘅佢又醒起曬太陽又點會收稅呢，於是佢喺夢中笑醒。