伶人演唱更添優雅

香港繁華背後，窮人生活捉襟見肘，社聯尋日發表統計數字，全港有一百二十六萬人收入少於全港住戶入息中位數嘅一半，創十二年新高。咁啱財爺鬍鬚曾尋日亦喺網誌撰文，提到阿婆大嬸推點心車打工餬口嘅茶樓百態，但唔係同情基層打工仔嘅淒苦，而係慨嘆茶樓風雅褪色，佢呢份附庸風雅閒情，同社聯嘅統計報告簡直相映成趣，香港有咁嘅財爺，窮人仲有乜寄望？

鬍鬚曾早前喺網誌講完中秋燈籠，尋日輪到講「我的飲早茶至愛」，由一盅兩件講起，指英國人愛high tea，美國華埠多叫「去吃點心」，而佢愛「飲茶」呢個名，因帶舊時回憶。然後，佢大發傷春悲秋之情，回憶兒時上茶樓，蝦餃同叉燒包嘅叫賣聲此起彼落，亦會聽到了哥、畫眉橫樑鬥唱，傍晚更加有伶人演唱，「更添優雅」。但喺佢眼中，呢啲場面依家唔見晒囉，大嬸變點心妹、點心車變點心紙，話好似隔山買牛咁，睇唔到賣相，送上枱嘅點心亦失去熱騰騰嘅色香味。

佢喺網誌話鍾意光顧嘅嗰間酒樓，仲有點心車，等佢可以睇啱至點，「籠籠熱辣辣」，佢鍾意食嗰度嘅菠蘿叉燒包，形容係中西合璧，好似奶茶溝咖啡嘅「鴛鴦」，尤其愛食蝦餃，話靚蝦餃唔易食到，酒樓水準，一個蝦餃就可以分出高下咁話。

「何不食肉糜」翻版

認真識食識歎！唔知佢寫呢篇附庸風雅文章時，有冇諗到貧窮人士數目又創新高，又有幾多清苦兒童連上茶樓機會都唔多，遑論要揀有冇點心車、蝦餃係咪粒粒晶瑩，鮮甜爽口。

以佢幾百萬年薪，當然乜都有得揀，佢可以搵一間出品靚蝦餃、點心熱騰騰嘅茶樓，食到肚滿腸肥，但佢筆下推點心車嘅大嬸有冇得揀接唔接受首個最低工資水平呢？喺現時貧富懸殊愈嚟愈嚴重嘅香港，無論點心妹定酒樓大嬸都搵食艱難，唔該鬍鬚曾唔好再上演「何不食肉糜」嘅鬧劇，刺激貧苦大眾嘅神經好唔好！睇怕處喺水深火熱嘅低下階層市民恨得咬佢嚟食呀！