行會成員劉皇發近排因為漏申報利益事件而煩惱，佢女婿、信和集團總經理余漢坤（Randy）尋日出席公司慈善活動時，就為外父講好說話，話發叔咁多公司同下屬，未必知得晒所有嘢，事發之後，發叔已加強同秘書溝通，又向公眾道歉咗，心情都平復咗，Randy仲話會抽多啲時間陪吓發叔喎！
信和集團同小童群益會尋日喺荃新天地舉行越野慈善賽，比賽攀石牆同踩單車。自細喺大澳長大嘅Randy，原來踩單車好叻，佢話屋企以前喺大澳經營米舖，細細個放學後會幫手踩單車送米，一日送兩次，每次送二十斤，喺大街小巷穿梭。
Randy除咗踩單車外，滑雪一樣得，但自從三年前個仔出世後已冇玩，所以佢好期待囝囝足四歲、骨骼強健後，兩仔爺一齊去滑雪。