港府較早前宣布就申辦二○二三年亞運會舉行諮詢，初時只有六個禮拜，前日當局忽然宣布延長諮詢期，前後十個禮拜，直至十二月五號先屆滿，等市民慢慢表達意見。德成局長宣布呢個「好消息」，民政局竟然一啲配合都冇，事隔一日都未見佢哋更新網頁，當局幾年前承諾要建亞運設施，結果唔係爛尾就係冇影，今次連簡單嘅改數字都冇人跟，點怪得人哋對佢哋要花四百幾億辦亞運冇信心呢？
德成局長領軍申亞嘅準備工夫真係好麻麻，花四百幾億公帑嘅解釋更係不知所云，輿論一面倒鬧爆，立法會多個大黨派先後表示唔支持，甚至最大嘅建制黨民建聯都唔肯落疊，德成局長嘅情況，真係可以用一句「舉目無援」嚟形容。
尋日我哋上申亞諮詢網頁睇過，唔少網民亦覺得延長諮詢無用，繼續質疑申亞決定。但奇怪嘅係，網站根本無登到延長諮詢嘅消息。最新消息一欄中，「最新」嘅只係德成局長上月廿四日就申亞接受訪問嘅紀錄。既然有咁重要嘅消息，理應拿拿臨公告天下，點解懶得去更新呢？