立法會工作有跟紅頂白，但熱潮過後就走晒樣。舊年十月啱啱爆出白鴿黨議員甘乃威怒炒女助理，同「有好感」事件後，全城轟動，政界好多人都撐調查，亦有人趕住抽水。不過，一年之後，個會嘅調查進度慢過蝸牛，「有被告冇原告」更令工作困難重重，受注視程度都大降。
政圈風聲近日仲流傳，百足咁多爪嘅林大輝因為公職纏身，猛呻好多嘢做，加上又牽頭成立嘅地區組織「C18」任召集人，有意申請退出甘威調查委員會。咁做咪隨時令啱啱湊夠七人嘅委員面臨解散厄運，變相放生甘威？其實大輝任監警會副主席，早前已被揭缺席咗約一半會議，家吓又想中途退出甘威調查，真係要諗清諗楚。話晒佢正職係立法會議員，應該以議會事務為重，如果因為咁搞到個委員會散檔，恐怕會大失民心。