海口總共有十個高爾夫球場，仲有五百一十八間酒店房間、十一間主題餐廳、會議設施、水療中心、康體歷奇設施、購物商店等，仲有興建中嘅貴賓獨立屋、二百三十八個融合七大洲設計嘅火山岩溫泉，成個綜合旅遊規劃總共耗資三百億元人民幣，預料會於未來三年相繼落成。

謙稱爸爸英雄造時勢

要喺一萬年歷史嘅火山岩地上面興建度假村，絕不簡單，既要重新鋪土種草，又要保留原來面貌，發展過程中，阿Ken亦好注重環保，好似生長喺火山岩上嘅兩萬幾棵荔枝樹，佢就下令一棵都不能少，仲加種護生植物，保護樹木繼續生長。

據講，身為總指揮嘅觀瀾湖老闆朱樹豪一見到海口呢笪地時，二話不說就扑錘，睇中幅地無人住，減少發展阻力，加上近機場，交通方便，氣候又無三亞咁熱，阿Ken呢兩年全力幫父親創造海口神話，點石成金，睇住度假村相繼落成，阿Ken都好謙虛話：「我好佩服我爸爸，佢真係英雄造時勢！」