保險界立法會議員陳健波同太太十．一當日入馬場玩，兩個人都笑到見牙唔見眼，好似大有斬獲咁。事後佢點都唔肯透露買咗邊場馬同贏咗幾錢，只係話贏少少，以前輸多贏少，今次補番條數。睇番波哥夫婦張贏馬相，當時跑第八場，頭馬係許世勳夫婦愛駒「賞惑」，獨贏派四百一十八元，波哥唔笑就奇囉！
隔咗一日，波哥邀請傳媒朋友遊船河，安排議員辦事處職員、助理同記者進行釣魚比賽，最後大家總共釣咗十幾條魚，唯獨波哥食白果，魚毛都無條，可能佢忙於招呼大家分咗心都未定。
立法會每年都誕生大懶蟲！波哥就為自己埋單計數，佢喺○九至一○年度參與嘅委員會共有廿二個，其中十八個會達到百分百出席率，全年共有三百三十二次會議，佢出席咗三百二十八次，只係缺席四次，佢相信自己可問鼎最勤力議員冠軍寶座喎！