本文重點
早前喺處理菲律賓人質事件中表現出色嘅保安局副局長黎棟國，近日紅爆政治圈，連電台新節目亦邀請佢擔任首集嘉賓。黎Sir喺節目中畀主持人問到「香港最急需解決嘅問題係乜」，點知黎Sir答嘅唔係佢管嘅範疇，例如校園驗毒，亦唔係答向日本發出外遊警示，而係話要解決貧富懸殊問題。
見推紙皮老人心都酸埋
聽到呢個答案，主持人都好詫異，話月薪二十萬嘅黎副局點會明白民間疾苦？於是黎Sir忽然好似拍《霎時感動》咁，話平時開車都會見到低下階層市民嘅生活狀況，偶然會見到手推車上滿載紙皮嘅老人家，睇到佢心都酸埋，所以即使畀後面啲車係咁響號，佢一於好少理，會保持慢駛，以免發生意外。講完之後，連主持人都大讚黎Sir雖然進身上流社會，仍保持濃厚人情味。
嘩！身為候任保安局局長大熱人選，黎Sir咁體恤民情，睇嚟唔止可接李少光班，更大可撈過界，做勞工及福利局局長都得！