Anthony經歷五次金融危機，擅於運用逆向投資策略，提倡同市場反其道而行，偏好較冷門股份或喺股市大跌時趁低吸納。佢喺○七年退下火線後，擔任富達分析員同基金經理導師，今年二月重出江湖，掌管富達中國特別情況基金，跟住四月喺英國上市，表現理想，早前佢更移居香港，以便接近中國市場。

陳南祿話Anthony移居香港只有短短幾個月時間，大家認識冇耐，仲未知佢有冇攞香港身份證。問起有冇請教Anthony嘅投資心得，陳南祿話：「使乜啫，Anthony寫咗本『贏』（書）嘛，睇吓咪得囉！」陳南祿口中嗰本「贏」，唔知係咪指Anthony舊年出版嘅《Investing Against The Tide》（逆勢出擊）呢，Anthony喺書中分享多年投資心得。