本文重點
為被指吸納青年人民意手法過時嘅負面形象洗底，政府嘅新猷係開特首辦facebook（fb），早前更公開招聘兩名項目主任，主責管理fb網頁，月薪兩萬三千蚊至兩萬七千蚊，為期十八個月，可謂係搶手筍工。有「特首辦新媒體總管」外號嘅特首辦特別助理陳岳鵬尋日喺一個酒會上透露，共收到三千份應聘申請，即一千五百人爭一個位，可謂爭崩頭，如果外界對特首辦fb都有咁好反應，政府嘅民意工程就唔使咁頭痕啦！
陳岳鵬唔夠in
陳岳鵬話經過兩輪篩選，已經揀選出兩人，預期今個月內返工。佢對兩名特首辦新成員嘅身份三緘其口，但就話fb管理員唔熟悉政府運作唔緊要，反而有時事觸覺更重要，所以面試問題會考應聘者對時事嘅睇法，好似八達通出售客戶私隱資料圖利、資助市民置業同社會仇富心態咁，嚴謹度拍得住遴選政治助理，唔知做fb管理員使唔使放棄外國護照呢？
身為「特首辦新媒體總管」嘅陳岳鵬原來對時下資訊潮流玩意都有盲點。佢最近買咗部iPhone 4，但當佢從記者口中得知一個叫「WhatsAPP Messenger」嘅軟件，下載後用戶之間就可免費傳手機短訊後，竟露出驚訝神色，好似發現新大陸咁即時下載試用。其實，WhatsAPP係iPhone用戶最熱門嘅下載軟件，長期排首位，好多年輕人都知。睇嚟佢快啲學多啲喇，唔係畀兩個新下屬追過就唔好啦。