本文重點
香港女童軍總會總監邊陳之娟涉嫌違規超齡參選嘅醜聞，到依家都未知點收科，尋日喺十．一酒會上見到着住一身童軍服飾嘅邊太，佢笑臉迎人，似乎相當陶醉；相反邊太嘅童軍戰友、教育局局長孫明揚太太鍾小芬就好懊惱，仲呻話最近頻頻要睇中醫調理身體。吓？有乜病痛呀？追問下原來佢近排為女童軍醜聞瞓得唔好，晚晚發噩夢！
孫太話近期女童軍負面新聞不絕，仲搞到有人向廉政公署舉報，令佢好憂心，搞到晚晚發噩夢，夢見學生年代嘅自己，起床後趕住洗面、着校服返學校考試，嗰種惶恐失措嘅夢，已經幾十年冇發過。佢又話依家仍就事件諮詢法律意見，相信要等到呢個月十三號女童軍開完會後至有定案。睇嚟孫太仲着緊過當事人喎！
湯陳戀主角孖住去酒會
喺酒會上仲見到「湯陳戀」主角廉政專員湯顯明同入境處助理處長陳詠梅，早前出席中策集團主席馬時亨慶祝「一桿入洞」餐飯時被記者踢爆後，佢哋嘅地下情迅即浮上水面，但估唔到浮水力驚人，尋日大方到孖住去酒會，只係影相時仲好怕醜，特登企開啲，中間隔咗個人，仲要搵埋當日肥亨飯局後護送佢哋離開嘅新聞處處長黃偉綸做戥腳一齊影相。
同場仲見到首次以署長身份出席酒會嘅懲教署署長單日堅，佢心情好輕鬆，仲話懲教署工作好有系統，只係更換領導啫！