月中施政報告有定案

政府就資助市民置業嘅諮詢期早前結束，依家風聲傳得最勁嘅，係以「先租後買」方式幫市民「上車」，即係政府租屋畀人住，部分租金將會儲作首期，到租期結束就發還畀租客去買樓，相信喺月中出籠嘅施政報告就會有定案。

「先租後買」呢套理念點解咁熟口熟面嘅？翻查富貴黨五月底嘅「租積金」新聞稿係咁講，建議申請居屋人士以市值租金租住公屋，期滿遷出後可取回市值租金同公屋租金嘅差額，作為置業首期之用。「先租後買」同「租積金」，簡直係孖生兄弟，幾乎一樣一模，同出一轍。

咦！咁咪即係政府偷富貴黨橋之後，再改名換姓，當係政府嘅傑作？係咪真係咁，相信只有負責呢瓣嘅運輸及房屋局局長Eva鄭汝樺先知嘞！

講句公道說話，「先租後買」構思並非富貴黨原創，九四年港英政府出過房屋政策諮詢文件，當時已有「先租後買」概念，但事隔十幾年，富貴黨重提概念，就算唔係專利，對政府都有提點作用，而且亦加進新元素，冇功都有勞吖！再者，富貴黨確為概念加入咗新元素，政府對富貴黨多謝都冇聲，又難怪富貴黨高層咁火滾。

僅派官仔撐場明落面

聽聞，有房屋政策官員向富貴黨高層私底下表明，煲呔曾器量有幾大，大家都知，以佢同富貴黨嘅關係，施政報告一定唔會見到「租積金」三個字咁話。仲有，富貴黨高層原本想約Eva見面，當面推銷同講解「租積金」，但遭拒絕；隔咗一段日子，當局派個低級官員聯絡富貴黨，邀請出席資助市民置業小組會，睇吓份出席者名單，個個名不經傳，唔夠級數，政府明落富貴黨面。

面對政府嘅挑釁，富貴黨高層密謀反擊，打算喺報紙登廣告，將建議「租積金」計劃嘅時序同概念公開，相信市民眼睛係雪亮嘅，究竟政府有冇偷橋到時一目了然。