01/10/2010

播放本新聞相關短片

Sun世代:為食嬌娃搞大飲食王國

誰會想到,一個外表嬌滴滴的女孩,卻是撐起飲食集團半邊天的「重臣」。鴻星集團營運發展總監何麗詩,是該集團行政總裁兼創辦人何永年的姪女,最初只為食好嘢入行,卻愈做愈起勁,而且敢於革新,成立「鴻星大學」培訓人才,又首創「外遊見學」引入各地美食,目標是將家族生意發展為百年企業,成為香港傳奇品牌。

擁有一張娃娃臉的何麗詩,九八年中大畢業後,曾在建築師樓和銀行工作,二○○○年加入鴻星飲食集團,是家族中唯一入行的第二代成員。當說起這個已經有二十一年歷史、以石頭魚和黃油蟹聞名的飲食王國,她即侃侃而談,更自爆入行只因饞嘴:「我見到有好嘢食會雙眼發光㗎!」

最初「諗住做一陣」便到澳洲升學,沒想到最後連讀書計劃也擱下:「喺呢度,可以將自己嘅idea實踐,有好大發揮同歸屬感。」

朝10晚11 邊做邊學

她入行時鴻星只有四間店,由最初一竅不通,到現在管理十四間鴻星海鮮酒家、十一間副線餐廳、一間食品廠和東京三間分店,下過不少苦功:「人哋畀面都係畀面我背後嗰個,所以我付出好多,星期一至日,朝十晚十一,入行至今,未放多過十日假!」

叔叔看見她的認真,將營商技巧傾囊相授:「阿叔帶我傾生意,邊做邊學,做耐咗,會睇到我嘅判斷啱唔啱。」她佩服叔叔最初只做樓面,靠積蓄和股東打天下,在尖沙咀開第一間店:「阿叔只係小學畢業,但見識好廣,好放膽畀我『較飛』!」

愛吃的她首創「外遊見學」,帶領員工到各地學習烹飪和參賽,刺激思維推出更多新菜式。她笑說:「除咗南北極外,我哋所有地方都去過!」開闢越南、日本菜等副線食肆,引入阿拉斯加活蟹等,都是「外遊見學」的成果。

「百年企業靠文化,惟有建立公司文化,先可以令品牌不斷延續。」何麗詩於○七年成立「鴻星大學」,灌輸學習與創新的核心價值,透過外展活動、小組討論等課程培訓人才。她自豪地說:「全港所有中式飲食集團都冇做呢樣嘢,我哋係唯一的一家!」

樽裝甜品 帶領潮流

○二年將招牌甜品楊枝甘露「飲品化」,變成一支樽裝飲品,○五年推出家庭裝盆菜,都帶起業界潮流。她謙稱:「係整個管理團隊嘅功勞,大家目標一致,希望將鴻星發展為百年品牌!」

何麗詩小檔案

現職

鴻星集團營運發展總監

學歷

中文大學政治及行政學系

婚姻狀況

未婚

興趣

搵好嘢食、旅行、睇飲食雜誌

Money18 新功能「18好路數」為你預測心水股票升跌機會率

李嘉怡