有人分析，工聯會拋出「5+1」強陣，似係表明唔再撐梁美芬，呢個推測其實射錯隔籬。工聯會的確唔妥梁美芬○八年得工聯會「過票」當選但事後從未認帳，亦睇唔過眼佢上任後少為具爭議性嘅政府議案護航，不過，工聯會心知佢係西環愛將，加上工聯會喺九西缺少悍將，所以根本無意踢走佢。

避免再有翻版梁美芬

工聯會認為過往喺特區政府不容有失嘅重大議題，工聯會護航不遺餘力，但每到選舉分餅仔，就要工聯會「過票」支持畀一啲專業、中產候選人，○八年梁美芬就係例子。所以今次高調出虛招，真正用意係防止建制派協調過程中，再次殺出幾個「梁美芬」。

消息指工聯會計劃派葉偉明參選新界東，黃國健喺九龍東競逐連任，但同屬建制派嘅龐愛蘭極想出選新東，連觀塘區議會主席陳振彬亦有意出戰九東，隨時變梁美芬翻版。為免歷史重演，工聯會索性先發制人，搶閘宣布五區都派人參選，暗示有關人士唔使旨意打工聯會嘅鐵票主意。換言之，棠哥打開口牌係「嚇鬼」，嚇走啲「嘩鬼」。