有「九巴金公主」之稱嘅九巴後人Winnie伍穎梅，早前畀記者影到同低調富豪許世勳嘅姪仔、中建企業董事許晉平「手疊手」談心，到依家一直都春風滿面。尋日Winnie出席一個公開活動，記者梗係第一時間恭喜佢啦，雖然佢笑而不語，但聽到許晉平個名就笑到合唔埋口。
佢哋兩個都係大忙人，要搵時間拍拖真係唔易。不過，Winnie話有心嘅話點都會搵到時間，因為工作時專心工作，玩樂時就要專心玩樂喎。一般情侶拍拖就係行街睇戲啫，兩位名人又有乜嘢節目先？Winnie自爆自己好鍾意搭電車，因為可以舒舒服服慢慢睇街景，仲甜絲絲咁話，最近許生啱啱帶佢坐完一次添！
最估唔到嘅係，Winnie原來好鍾意搭公共交通工具，除咗電車，周不時都會去坐船同纜車，好似唔慢都唔鍾意。不過都啱嘅，搭啲速度慢嘅交通工具，兩個人一齊坐，有風景睇，又可以一齊傾吓偈，都好浪漫吖！