白鴿黨同社民連之間嘅內訌蔓延到支聯會。身兼支聯會常委嘅社民連主席陶君行早前質疑支聯會為咗方便白鴿黨同中央談判，喺六四遊行中收起某啲口號同標語，結果畀支聯會公開批評。
陶君行尋日繼續質疑支聯會同白鴿黨冇分別，「一套班子，兩個招牌」，「同阿爺頂頸時就支聯會，溝通時就白鴿黨」，認為經歷政改等連串風波，大家已經冇乜互信，難以維持合作關係，故決定喺支聯會年底改選唔會競逐連任。另一支聯會常委、社民連立法會議員梁國雄亦話要三思會否參選。
此外，陶君行日前去信白鴿黨，要求對方承諾唔再同中央秘密談判，否則應退出泛民主派嘅區議會選舉協調機制同飯盒會。佢尋日話若果白鴿黨冇清晰承諾，又唔肯退出協調機制，社民連將自動退出，但唔代表佢哋會喺區選中狙擊白鴿黨，以免建制派漁人得利。
身兼支聯會秘書嘅白鴿黨主席鐵頭仁批評有關說法，對其他非白鴿黨嘅支聯會常委不敬。