如果唔係爆出行政會議成員劉皇發涉嫌漏報買樓利益同摸貨圖利，睇嚟都冇乜人知班區議會主席之前幾日訪問台灣。身兼屯門區議會主席嘅發叔係今次訪台團嘅團長，去到台北都畀本港傳媒越洋追訪，搞到好唔得閒，但佢見慣大場面，話咁快就收拾心情。
發叔喺十八區主席之中係最資深嘅一個，所以每逢帶隊外訪都習慣請食飯，好似六月帶班正、副主席遊上海世博期間就請食齋宴，今次訪台亦揀咗台北出晒名嘅國賓大飯店請客。發叔「豪」不手軟，安排一人一客「佛跳牆排翅」，又叫咗出晒名嘅「國賓牛小排」、片皮鴨、大蝦等，淨係餐前小食都有五、六碟，餐飯估計要幾萬蚊落樓，相信係成個行程之中最豐富嘅一餐。
身為九龍城區議會主席嘅廣東社團總會主席KK王國強，今次都有跟大隊去台灣。佢一向鍾意影相，去到邊都帶住部相機，仲將啲相放喺iPad，今次都唔例外，好似去到士林夜市就周街影嘞！