Sophia笑稱自己嘅廚藝好一般，只識煎荷包蛋、煮公仔麵同埋炸春卷，結婚咁多年，老公竟然從未享受過佢嘅手勢，只係兩個囡囡試過。至於老公嘅拿手好菜，係獨沽一味嘅煎牛扒，佢食過兩次咁多，一次係結婚之前，另一次係結婚之後，勁搞笑。

佢話兩公婆係名副其實嘅「無飯夫妻」，喺屋企好少煮飯，好彩老公同兩個囡囡都唔抗拒出街食。查實佢又確實好忙，話佢係百分百嘅事業型女強人都唔過分，公職多到數唔晒，除咗婦女事務委員會外，同時佢又係財務匯報局主席。