唔講唔知，Quincy喺中學讀國際學校時已認識Miyoung，稱得上係青梅竹馬，Quincy嘅爸爸呂錦泰同媽咪呂陳慧貞更對呢個新抱畀足一百分。Miyoung喺香港畢業後曾經返韓國做嘢，後來先回流香港。雖然兩人曾分隔兩地，但感情保持得好好，直到今年二月決定結婚。

Quincy話婚禮前都擔心自己會好緊張，但臨場見到咁多香港同外地嘅朋友嚟撐場，心情輕鬆好多，反而Miyoung就話有少少緊張，但緊張得嚟好開心喎！

結婚晚宴仲旺場，前馬會主席陳祖澤夫婦、教育局局長孫明揚夫婦、玩具大王蔡志明夫婦、金城營造主席王國強、行政會議成員梁智鴻、廉政專員湯顯明等都在場。Quincy喺保良局嘅一班兄弟亦有撐場，包括副主席鄭錦鐘、總理黃英鵬等，佢哋齊齊夾份打造一對夫婦造型嘅黃金公仔，祝願Quincy夫婦白頭偕老。