八達通洩私隱民憤難平

眾所周知，早前爆出八達通擅自賣私隱圖利醜聞，雖然港鐵同八達通高層已經向公眾道歉，而八達通董事局亦接受咗總裁陳碧鏵自行辭職，但未能平息公憤，事後發現原來有更多類似事件，市民嘅私隱完全冇保障。

咪以為立法會抖暑，件事就攤凍咗，實情仲喺度燒緊，事關工聯會嘅議員「阿王」王國興仲係㷫過辣雞，仲準備做狙擊手。阿王並唔係財經事務委員會成員，喺外邊嗌破喉嚨都冇用，所以佢喺立法會復會後就會補飛，加入呢個委員會，仲揚言會三箭齊發，追殺八達通添！

討論藥駕條例增加曝光

點為之三箭齊發？首先，阿王尋日致電畀個人私隱專員公署，知道相關調查報告尋日完成，但仲未公布得，而佢就要求公署喺今個月七號將報告公開發表；其次，喺立會復會後即時討論引用《立法會（權力及特權）條例》，命令八達通卡有限公司提交資料；最後就係喺立法會動議辯論有關保障私隱嘅措施。睇嚟八達通同港鐵都好頭痕。

阿王係為咗公眾利益，但另一個準備做狙擊手嘅白鴿黨黃成智似乎就係為私利多啲！鄭家富喺政改方案一役退出白鴿黨，成智取代佢做黨嘅交通事務發言人，但偏偏冇份傾呢排炙手可熱嘅藥駕條例草案，於是惟有喺復會後補位加入呢個草案委員會，目的係要狙擊前黨友，亦藉此增加曝光。

喺立法會抖暑期間，阿王兩公婆去咗葡萄牙同西班牙旅行鬆吓，仲特登去咗葡撻嘅發源地、位於首都里斯本嘅修道院參觀。據聞後來有商人向呢間修道院買咗條秘方，之後喺隔籬開咗間「Pasteis de Belem」，將葡撻發揚光大。佢即時食咗一個，發現確實好好味，仲好感慨咁話如果香港可以好似葡萄牙咁，大力鼓勵發展本地經濟，話唔定都可以有一間港版嘅「Pasteis de Belem」 。