24小時瀏覽記錄

政情：行會成員出口術拋東隧

加風四起，東隧亦提出瘋狂加價四成嘅申請，有行會非官守成員私下表明，如果東隧唔肯降低加幅，原封不動提交行會審議，就一定喺行會投反對票。呢位行會成員奉勸東隧研究降低加幅，否則等到行會否決加價申請後，咪等東隧去搵獨立仲裁人解決囉，一拖三、四年，對東隧一啲好處都無。

翻查紀錄，東隧過往曾先後兩次加價遇阻，最後都訴諸仲裁，第一次喺九七年，第二次喺○二年，兩次都勝訴獲加價，但○二年嗰次一搞就用咗三年時間，到○五年獲准加價近七成。食髓知味，東隧預先揚言，加價申請若遭否決，就準備第三次仲裁，希望拋窒政府。