周澄話，餸名係港台設計，臨場對白就係自己爆肚，但佢臨場表現真係麻麻，到煮「勁煀鯉」時，材料有A貨錦鯉、髮菜、蠔油同埋生油，寓意係寸特區政府搞唔掂樓市，抽水抽得勁嘅發展商發晒；第二味「扣豬脷」就諷刺港府處理港台問題溫水煮蛙，影響港台言論自由。

做評判嘅劉夢熊並冇食到呢兩味餸，但就點評話，港府固然要改善分配不公，但都唔應該搞針對，所以呢味餸只係一般；至於第二味直頭過晒火位，事關傳媒可以報道「五區公投」，足證溫水煮蛙之說唔合格。