本文重點
英皇慈善基金最近撥款贊助善寧會同聖雅各福群會，合作舉行「愛‧回味」懷舊美食午宴，邀請一百五十位末期病患者同參加咗善終服務嘅長者出席，品嘗城中著名食府製作嘅五、六十年代懷舊美食，畀啲公公婆婆緬懷昔日嘅美好時光。英皇集團主席楊受成仲親自出席支持，既出錢又出力，唔少公公婆婆都大讚午宴充滿懷舊港式風味，令佢哋食到停唔到口！
今次懷舊美食午宴菜式非常豐富，九個餸兩款甜品，由鏞記、大榮華同英皇駿景酒店等著名食府烹調，包括鏞記嘅溏心皮蛋配酸薑、脆皮燒鵝片、陳皮紅豆沙，大榮華嘅酥炸鯪魚球等。
向多間商業機構籌款
咁多種菜式裏面，最令公公婆婆讚不絕口嘅就係英皇駿景酒店炮製嘅杏汁白肺（豬肺）湯，患有皮膚癌嘅七十八歲譚大珠伯伯就話，以前譚母成日煲畀佢飲，不過近年呢啲咁懷舊嘅湯水已經好難飲到，透過今次午宴難得可以緬懷一番。個湯除咗潤肺，簡直仲滋潤埋老人家嘅心靈。
英皇慈善基金同時透過今次午宴向多間商業機構籌款，善款會幫善寧會同聖雅各福群會繼續推行善終服務同生死教育。