本港即將進入選舉戰國時代，出年有區議會選舉、後年有立法會選舉，再加上選舉委員會等，政黨忙於擺位搶位，政治顧問同競選經理都成為職場新貴，工聯會嘅大狀鄺志堅尋日透露，佢做埋今日後就會離開工聯會，自立門戶做政治顧問生意，專幫人進攻議會，同時亦為政壇發掘同打造新星。佢話到明客仔主要來自建制陣營，咁講咪即係同建仔嘅程介南爭飯碗？
增議席市場空間大
鄺志堅做唔做到金牌經理人仲未知，但佢準備好充足，雖然仲未搵到寫字樓，但佢已經印定臨時卡片，打出「鄺志堅顧問公司」嘅名堂招攬生意，據講，依家已經有準備競選區議員嘅潛在客戶搵佢。佢認為，未來幾年本港政治生態變化好大，立法會議席增加催生選舉工程更具規模、競爭更大，市場空間會變得好大。
幕前幕後經驗豐富
九五年工聯會現任會長鄭耀棠進入立法局時，鄺志堅已經喺幕後幫手做議會支援及聯絡工作，跟住又做過工聯會嘅立法會議員，幕前幕後積累唔少經驗，講到政治人才培訓時，鄺志堅一臉自信咁hardsell：「依家有啲人做政治分析、議員培訓，噏兩噏就收幾萬蚊，佢講不如我講。」
市場有需求外，鄺志堅都不諱言，自立門戶仲有一個好重要嘅原因，就係屋企冇經濟壓力。因為佢嘅大仔喺科大讀完工商管理後，已經入咗間大型外資銀行做嘢，仲開始貢獻家用添；至於細仔就喺中大讀書，而佢做緊公務員嘅太太出年又會退休，一家人生活好穩定，鄺志堅話都係時候做份Hea啲嘅工作囉。所以今次出外闖吓，既係一種嘗試，亦係一個優游嘅選擇。