說話陰聲細氣，感覺不慍不火的阿勤，骨子裏運動細胞爆棚，教人出乎意料。工作以外，他愛行山，又愛打乒乓波，跑過馬拉松，亦是一名足球健將。可惜兩年前他的「黃金右腳」終於受不了，膝頭韌帶因過度勞損斷掉，難再一展球技。
提起興趣，阿勤顯得倍感雀躍，跳出了他看起來文質彬彬的框框：「我鍾意影相……」原來影風景他都好「拿手」，想了想他又說：「行山、打乒乓波……仲有踢波！」說起來的樣子也特別「醒神」，他放假一有時間就會約朋友四處行山，舒展身心；打乒乓波則是由小學開始培養的興趣，曾經多次代表學校出賽，戰績彪炳。
男孩子愛踢波，他都不例外，享受種種運動的樂趣，但運動量過多，反而帶來遺憾：「右腳膝頭痛咗好多年，兩年前一次在屋企發現隻腳伸唔直，原來韌帶斷咗，之後做咗兩次手術，依家雖然好番，行山都無問題，不過就唔適宜再做劇烈或者有碰撞性嘅運動喇。」