史醫生話現階段未諗過入會，因為自己太多嘢做，冇時間開會，所以加入都冇意思。再問佢使唔使事先同匯賢主席葉劉淑儀「申報」呢？點知佢好大反應，話自己唔係三歲細路哥，唔需要做乜都問人喎！

大輝打晒開口牌

史醫生喺○八年孖住葉劉選立法會，可惜唔夠票入唔到圍，若果佢入咗廠商會，進身政壇必定又多個好路數，再加上立法會廠商會嘅代表林大輝亦搞咗個地區組織「社區十八」，被視為直選後援會，咁就要睇吓大輝夠唔夠牙力撬史醫生過檔，甚或日後代表廠商會選區會同立法會喇！

大輝尋日都打晒開口牌，話鼓勵廠商會派多啲人選區議會、立法會，甚至係選委會選舉，因為只要廠商會多啲票，就自然可以選個合心水嘅特首喎！咁大輝心水係邊個？佢就鬼鬼馬馬咁話，佢手中嘅係鐵票，冇人可以動搖喎。