城市大學前晚搞咗個校友論壇，題為「從美饌細嚐五味人生」，校長郭位親自下廚炮製一味酸辣湯，以比喻人生嘅唔同經歷。郭校長自爆最大興趣係入廚，細細個喺台灣經常跟阿媽去街市買餸，佢拿手菜式有好多，酸辣湯係其一。佢話煮餸絕對唔加味精，亦好少落糖，只要用真正材料就夠，仲笑笑口舉例話一個靚女，就算唔化妝都係靚女喎！
雖然酸辣湯係郭校長嘅拿手菜，但事前佢都有少少擔心，事關前晚大會只提供番薯粉做芡粉，佢未用過唔知點掌握，但最後都順利完成，有校友以十萬元投得，仲即場同在場校友以及嘉賓分享。當晚做嘉賓嘅中策集團主席馬時亨大讚郭校長煮一煲酸辣湯就籌到十萬元，建議郭校長喺城大開番檔熟食，相信好快可以為學校籌到一億元喎！
面對郭校長味酸辣湯，肥亨話人生中要嘗盡甜、酸、苦、辣先算得上係完整嘅人生，從而懂得珍惜同欣賞身邊嘅一切。究竟肥亨人生最甜喺邊個時刻呢？佢話就係當年喺外國認識佢太太王培琪嘅時候，就算一個人生活點艱苦都好，都唔再感到孤單。