霍公子細佬霍震寰同佢囝囝啟文一早現身，霍震寰原本喺北京參加中華海外聯誼會嘅年度大會，為咗今次盛事特登「請假」返港。其後佢太太霍陳琪琪同囡囡Melissa思緯嚟到，見佢兩母女不約而同手挽Hermes靚袋。霍太話鍾意呢個牌子夠Classic，佢個袋係三十五吋淺啡色，而Melissa就鍾意黑色三十吋，襯晒佢哋唔張揚嘅性格。

問到Melissa依家做緊乜嘢時，媽咪笑言唔方便幫囡囡發言，叫記者直接問佢。Melissa對住記者有啲緊張，但好有禮貌咁話依家喺出面打工，又學緊設計相關嘅嘢，遲啲有新消息至同記者傾。見記者被悶熱嘅天氣搞到流晒汗，佢仲好善解人意咁攞張紙巾畀記者抹汗添！

霍英東遙感科學館係霍英東生前捐贈四千萬元興建，係中國南方最重要嘅衞星遙感研究設施，佔地逾二千平方米，館內設有多個實驗室。主禮嘉賓之一嘅中國科學院專家郭華東話，設施有助於監測自然災害、城市建設情況，同內地有關設施可起互補作用。