美加考察團三度拋錨

話說呢個小組早喺舊年已計劃去美加「考察」，但係一波三折。首次定咗九月尾出發，點知撞正建國六十周年，大夥兒要北上，焗住取消；之後改為今年年頭，又適逢美加落大雪，海港結晒冰冇嘢睇；終於佢哋第三次定出發日期，諗住前日出發實冇走雞，但居然又有成員臨時放飛機，一行五人得番三丁友，最後又要拋錨告終。

雖然美加之旅已經拋錨三次，但小組依然死心不息，誓要去到為止。佢哋上禮拜開會時，初步定咗出年復活節假期再去，但數口向來都精嘅公文袋Tanya陳淑莊，竟然喺會上提議二○一二年先去喎！仲有冇遲啲呀，何解呢？

原來依家每個議員都有五萬五千蚊外訪津貼，喺每屆會期前都會埋單計數，任何議員剩餘嘅津貼，都會分番畀啲用凸咗嘅議員。Tanya言下之意，無非係想喺二○一二年今屆立法會會期埋單計數前，去個又遠又貴嘅團，用盡埋其他議員剩低嘅津貼，總之就係要榨乾榨淨。

大舊提議先去轉青島

講得興起，Tanya仲話如果嫌美加團遠嘅話，去番轉新加坡都好。社民連「大舊」陳偉業亦都加把嘴，提議喺美加團成行前去轉青島先喎。

嘩！咁佢哋咪好着數？去短程使咁啲錢，跟住就打其他同僚啲外訪津貼嘅主意，隨時標尾會，呢個如意算盤係咪打得響㗎？因住爛尾喎！

查實班議員外訪時，周不時都趁機攜眷同遊，把握機會旅遊兼探親。為咗杜絕呢啲情況，立法會秘書處早喺休會前，已經訂立咗規則，唔畀佢哋喺訪問期間遲到早退。不過喺花咗咁多錢做研究下，議員們係咪務必要山長水遠、花咁多錢去美加考察人哋個海港，就真係見仁見智嘞！